මේ ඉරහඳ මගේ නම්
ඉරයි හඳයි ලොවට පුදා ඔබව පතමි මම්....
මේ ඇල දොළ මගේ නම්
දිය බිඳකුදු නොසඟවාන පවස නිවන්නෙම්..
සිසිල ගෙනෙන පවන් රැල්ල මගෙකෙස් රොද මුදා යන්න!
ඇඟිලි තුඩග සුව විඳින්න මොහොතක් මට ඉඩ හරින්න!
මේ වන පෙත මගේ නම්...
වනය සරන සියොත් කැලට සෙවන සදමි මම්..
මේ වැහි පොද මගේ නම්...
ඉඩෝරයේ මහී කතට සුවය ගෙනෙමි මම්..
සිත සනහන සොඳුරු දසුන් සිතිජ ඉමෙන් දුරට යන්න !
නෙතු කැල්මක සුව විඳින්න මගෙදෙනෙතට ඉඩ හරින්න!
මේ කඳුහෙල් මගේ නම්...
අහස පොළව යා කරන්න පෙත සකසමි මම්...
මේ රල පෙළ මගේ නම්...
වෙරළ සරන කුඩ මසුන්ට අහර ගෙනෙමි මම්......
වැයෙන මිහිරි ගී පද තනු මගෙ සවනින් දුරස් වෙන්න!
මුදු තෙපුලක දැවටෙන්නනට දැන්වත් මට ඉඩ හරින්න!
මේ මුලු ලොව මගේ නම්...
නුඹ පය රැඳි දුහුවිල්ලට ලොවම පුදමි මම්....
නුඹෙ හදවත මගේ නම්...
මගෙ පණ නල සැඟවෙන තුරු නුඹ සුරකිමි මම්....
සියලු දුක්ඛ දෝමනස්ස මගේ සිතින් පහව යන්න!
ගැබ සරසන නුඹේ පුතුට බිහිවෙන්නට ඉඩ හරින්න.
No comments:
Post a Comment